2001 ൽ പുറത്തിറങ്ങിയ ബോളിവുഡ് ചിത്രമായ അശോകയിലെ “സാൻ സനാന” എന്ന ഗാനം അപ്രതീക്ഷിതമായി വീണ്ടും സോഷ്യൽ മീഡിയയിൽ ഉയർന്നുവന്നിരിക്കുകയാണ്. എന്നാൽ ഇത്തവണ ശ്രദ്ധ ആകർഷിക്കുന്നത് സംഗീതത്തിനല്ല, മേക്കപ്പിനാണ്.
ലോകമെമ്പാടുമുള്ള ഇൻസ്റ്റഗ്രാം ഇൻഫ്ലുവൻസേഴ്സ്, പ്രത്യേകിച്ച് വിയറ്റ്നാമിൽ നിന്നുള്ളവർ, “അശോക മേക്കപ്പ് ട്രെൻഡ്” ഉപയോഗിച്ച് സോഷ്യൽ മീഡിയയിൽ മോക്കോവർ വീഡിയോസ് പങ്കുവച്ചു. പാട്ടിനൊപ്പം അഭിനയിച്ച് മേക്കപ്പിട്ട് ബ്രൈഡൽ മേക്കോവറാണ് ഇവർ ചെയ്യുന്നത്.
ഇന്ത്യയിലെ ഇൻസ്റ്റാഗ്രാം റീലുകളിൽ നിന്ന് ആരംഭിച്ച ഈ ട്രെൻഡ് ലോകമെമ്പാടും അതിവേഗം വ്യാപിച്ചു. ലോകത്തിന്‍റെ വിവിധ കോണുകളിൽ നിന്നുള്ള ആളുകൾ ഈ റീൽ ഏറ്റെടുത്ത് ചെയ്യുന്നുണ്ട്.
എഐ ആർട്ടിസ്റ്റ് @rhetoricalronak പ്രശസ്ത ബോളിവുഡ് നടിമാരായ ആലിയ ഭട്ട്, അനന്യ പാണ്ഡേ, ശ്രദ്ധ കപൂർ, കങ്കണ റണൗത്ത് എന്നിവരെ ഉൾപ്പെടുത്തി ഒരു പ്രത്യേക വീഡിയോ തയാറാക്കി. എഐയിൽ സൃഷ്ടിച്ച ഈ വീഡിയോ ഇൻസ്റ്റാഗ്രാമിൽ അതിവേഗം വൈറലായി.
അശോക ചക്രവർത്തിയുടെ ആദ്യകാല ജീവിതം ചിത്രീകരിക്കുന്ന ബോളിവുഡ് ചിത്രമാണ് ‘അശോക’. ഷാരൂഖ് ഖാനും കരീന കപൂറും അഭിനയിച്ച ഈ ചിത്രം അന്താരാഷ്ട്ര ചലച്ചിത്രമേളകളിൽ അംഗീകാരം നേടുകയും നിരൂപക പ്രശംസ നേടുകയും ചെയ്തു.
